Në Islam, qëndrimi ndaj ndërhyrjeve estetike dhe kirurgjike është një çështje e ndërlikuar, subjekt i interpretimeve të ndryshme nga dijetarët.
Në radhë të parë duhet të kuptojmë qasjen e fesë ndaj krijim të njeriut. Allahu i Madhëruar, që e ka krijuar njeriun në mënyrën më të bukur, ka lejuar që ai të zbukurohet dhe të ruajë bukurinë e tij në masa të arsyeshme dhe të moderuara. Në Kuran thuhet se gjërat e mira dhe të bukura janë të lejuara, ndërsa gjërat e këqija dhe të shëmtuara janë të ndaluara (Maide 5/4-5). Një suren A’raf thuhet: “Thuaj: “Kush i ka penguar stolitë dhe ushqimet e këndshme, të cilat Ai i ka krijuar për robërit e Vet?” Thuaj: “Ato janë për besimtarë (dhe të tjerët) në këtë botë, ndërsa në botën tjetër do të jenë vetëm për besimtarët. Kështu ua shpjegojmë shpalljet njerëzve që dinë.” (A’raf 7/32). Profeti Muhamed (a.s), kur iu bë një pyetje rreth veshjes së bukur, ka thënë: “Allahu është i bukur dhe e do bukurinë” (Muslim, Iman, 41). Ai (a.s) gjithashtu ka qenë gjithmonë i pastër dhe i rregullt në jetën e tij dhe ka inkurajuar veshjen e thjeshtë dhe të bukur, si dhe përdorimin e aromave të këndshme.
Nga ana tjetër, në Islam, ndryshimi i karakteristikave dhe pamjes natyrore të njeriut, si dhe çdo ndërhyrje estetike ose mjekësore, që synon ta ndryshojë atë, nuk është mirëpritur. Këto ndërhyrje janë konsideruar si përpjekje për të prishur natyrshmërinë. Ndërhyrjet që synojnë të ndryshojnë krijimin e natyrshëm janë të ndaluara (Nisa 4/119). Profeti Muhamed (s.a.s) e ka konsideruar praktikën e bërjes së tatuazheve në trup dhe atë të mprehjes së dhëmbëve për qëllime estetike si ndërhyrje që ndryshojnë krijimin origjinal dhe prishin natyrshmërinë e njeriut. Ai i ka dënuar këto veprime (Buhari, Libas, 83-87; Muslim, Libas, 33).
Parimet thelbësore që duhen pasur parasysh në lidhje me ndërhyrjet estetike mund të përmblidhen si më poshtë:
- Qëllimi dhe nevoja: Nëse ndërhyrjet plastike janë të nevojshme për arsye mjekësore, si për të korrigjuar defekte të lindura, lëndime ose probleme shëndetësore që ndikojnë në mirëqenien e individit, ato zakonisht konsiderohen të lejueshme. Për shembull, operacionet për të riparuar dëmtimet pas një aksidenti ose për të korrigjuar deformime të shkaktuara nga ndonjë sëmundje janë përgjithësisht të pranueshme.
- Ndryshimi i krijimit të Zotit: Islami ka një ndalim të qartë për ndryshimin e krijimit të Zotit, që është i shprehur në disa ajete të Kuranit dhe në hadithe. Ky ndalim ka të bëjë më shumë me ndërhyrjet që nuk janë të nevojshme dhe që përpiqen të ndryshojnë pamjen natyrore të individit për qëllime estetike. Për shembull, ndryshimet që bëhen për të ndjekur standarde të bukurisë, të cilat nuk janë të nevojshme për arsye shëndetësore, mund të jenë të diskutueshme dhe shpesh konsiderohen të papranueshme.
- Të mos dëmohet shëndeti dhe pamja: Çdo ndërhyrje që mund të rrezikojë shëndetin ose të shkaktojë dëmtime të panevojshme është e papranueshme në Islam. Ndërhyrjet plastike që përfshijnë rreziqe të larta dhe që nuk ofrojnë përfitime shëndetësore të qarta janë të papranuara.
- Njerëzimi dhe nderi: Islami thekson rëndësinë e ruajtjes së nderit dhe personalitetit të individit. Ndërhyrjet plastike të motivuara nga komplekset e jashtme, shkelin dukshëm këtë parim.
- Këshilla dhe mendime profesionale: Para se të merret një vendim për një ndërhyrje plastike, është e rëndësishme të konsultoheni me mjekë myslimanë të besueshëm dhe me njohës të mirë të fesë për të kuptuar nëse ndërhyrja është në përputhje me parimet islame dhe të siguroheni që është e nevojshme për arsye shëndetësore.
Mund të themi që ndërhyrjet estetike janë të lejueshme në përputhje me kushtet e mëposhtme:
- Nuk duhet të bëhet me qëllimin për të ndryshuar krijimin origjinal dhe për të prishur natyrshmërinë e trupit,
- Kur ka një mundësi të lartë që ndërhyrja të sjellë dobi ose të largojë një defekt ekzistent,
- Ndërhyrja duhet të bëhet në kornizën e trajtimeve mjekësore,
- Ndërhyrja nuk duhet të bëhet me qëllim mashtrimi ose për të imituar fizikisht gjininë tjetër.
Në përmbledhje, ndërhyrjet plastike në Islam janë të lejueshme nëse ato janë të nevojshme për arsye shëndetësore dhe nuk përpiqen të ndryshojnë krijimin natyror të Zotit për qëllime estetike. Çdo vendim për të kryer një ndërhyrje plastike duhet të bëhet duke u mbështetur në këshilla të kujdesshme dhe në respektimin e parimeve islame.
