Informacion i përgjithshëm
Instituti për Studime Islame “Hafiz Sabri Koçi” u themelua në shtator të vitit 2021 me vendim kryesie të Komunitetit Mysliman të Shqipërisë. INSI “Hafiz Sabri Koçi” ofron një program trajnimi një vjeçar për çdokënd që dëshiron të fitojë një formim në diturinë fetare, duke plotësuar kriteret minimale për të kryer detyra si imam dhe myezin. Gjithashtu ky program i drejtohet çdo individi që dëshiron të marrë njohuri themelore fetare. INSI “Hafiz Sabri Koçi” është njëkohësisht një platformë, që nëpërmjet “Këshillit për Çështje Fetare” ofron opinione fetare në lidhje me çdo pyetje që i drejtohet. Ky institucion është i angazhuar edhe në studime të avancuara akademike duke organizuar apo duke u bërë pjesë si partner në konferenca, seminare, trajnime dhe botime të ndryshme.
INSI “Hafiz Sabri Koçi” synon që të kontribuojë në masën më të gjerë të komunitetit të besimtarëve myslimanë, duke ngritur nivelin e njohurive fetare tek stafi i xhamive, por edhe të çdo besimtari të thjeshtë. Për këtë arsye studimi në këtë institut është pa pagesë dhe mësimdhënia realizohet fizikisht e kombinuar me sistemin online.
Studentët që përfundojnë me sukses këtë program trajnimi pajisen me një çertifikatë, e cila shërben edhe si dëshmi kualifikimi për tu punësuar si funksionar në xhamitë brenda territorit të shtetit shqiptar.